Guddiga Olambikada Soomaaliyeed GOS oo Bilad Sharafta Sanadka IOC Guddoonsiiyay ELMAN

Waxaa xarunta Nabadda iyo Isboortiga Elman ka dhacday xaflad si weyn loo soo agaasimay kuna saabsanayd guddoonsiinta Jaa`isadda sanadka ay bixiso hay`adda Olambikada Adduunka ee I.O.C .

Guddiga Olambikada Soomaaliyeed ayaa abaalmarintan bilad sharafta ah guddoonsiiyay Xarunta Nabadda iyo Isboortiga ee ELMAN oo muteystay in sanadkan la guddoonsiiyo abaal marintan iyadoo abaal marinta I.O.C ugu talagashay in la guddoonsiiyo shaqsiyaadka ka ama Hay`adaha qeybqaata horumarinta iyo dhiirigelinta isboortiga iyo la dagaalanka muqaadaraadka.

Guddoomiyaha XSKG Maxamed Xuurshe Xasan [Eenoow] ayaa ka hadlay muhiimadda Abaalmarinta (Trofeo) isagoo sheegay in ay tahay abaalmarin qaali ah oo dhinaca IOC ay ugu talagasho sanad walba in ay guddoonsiiyaan shaqsiga sida weyn ugu qeybqaata horumarinta isboortiga iyo ka hortagga muqaadaraadka wuxuu sheegay in G.O.S oo la soo mariyay abaalmarinta ay si weyn uga fakiraan cidda mudan sanadkanna ay noqotay ELMAN.

Sidoo kale waxaa halkaasi hadal kooban ka soo jeediyay Guddoomiye ku xigeenka GOS Xaaji Cabdi Cilmi Warsame wuxuuna tibaaxay in ay abaalmarintan guddoonsiinayaan shaqsigii iyo Hay`addii ka qeybqaata dhiirigelinta isboortiga sanad walbana ay guddoomayso ciddii mudan.
”Waxaan soo jeedinayaa in loo tartamo dhiirigelinta iyo waxqabadka isboortiga Soomaaliyeed , Maanta ELMAN beri cidii mudata ayaa helaysa.” ayuu ku daray Xaaji Cabdi.

Madaxa Hay`adda Youth Link ahna Guddoomiyaha Naadiga ELMAN ayaa uga mahadceliyay abaalmarintan G.O.S iyo I.O.C wuxuuna tilaamay inay ku dadaali doonaan mar walba horumarka isboortiga dalka isagoo tibaaxay isboortiga inuu horseed u yahay nabadda iyo isdhexgalka bulshada , Guddoomiyaha ayaa shaaca ka qaaday in si weyn ay uga qeybqaadan doonaan Maalinta Olambikada Adduunka [Olympic Day] isla markaasna Hay`addiisa ELMAN ay boqolaal dhallinyaro ugu qeyb qaadan doonaan barnaamijyada lagu weynaynayo maalintaasi
Ugu danbayn Guddoomiye ku xigeenka 2aad ee G.O.S Xaaji Cabdi Cilmi Warsame ayaa abaalmarinta (Trofeo) gacanta u geliyay Madaxa Hay`adda Youth Link ahna Guddoomiyaha Naadiga Elman Farxaan Cusmaan Xasan .

Ma`aha markii ugu horeysay oo ay abaalmarin noocan oo kale ay Guddiga Olambikada Soomaaliyeed guddoonsiiyaan shirkadaha iyo shaqsiyaadka qeybta weyn ka qaata horumarinta isboortiga waxaa hore abaalmarino noocan oo kale la guddoonsiiyay shirkadaha Jubba Airways,Telcom Somalia iyo Jen. Cabdi Xasan Cawaale {Qeybdiid}, waana markii afaraad oo ay bixiyaan GOS Trofeo noocan oo kale ah.